Gintuman na sang alkalde sa Paris, France ang promisa sini nga maglangoy sa bantog nga River Seine agud pamatud-an nga malimpyo na ini kag sarang gid mangin venue sang swimming events para sa 2024 Olympics.
Suksok ni Paris Mayor Anne Hidalgo ang wetsuit kag googles sang nagpanaog na ini sa tubig kaupod si Tony Estanguet nga amo ang head sang Paris Olympics Organizing Committee.
Sang nagligad nga bulan pa kuntani ang schedule sang 65-anyos nga alkalde nga tumanon ang iya promisa apang wala nadayon bangud santo sa water tests, ang E.Coli bacteria nga amo ang palatandaan sang fecal matter ang 10 ka beses nga mas mataas ipaanggid sa otorisado sini nga limit rason nga delikado gid sa ikaayong lawas sang magalangoy.
Talalupangdon nga kadungan sang paglangoy sang alkalde sa River Seine, absent si French President Emmanuel Macron bangud sa ginakasakuan sini nga political crisis bangud sa snap parliamentary elections sang nagligad nga bulan.
Sang nagligad nga semana, ang una nga naglangoy sa suba agud mapamatud-an nga matinlo na ini amo si French Sports Minister Amélie Oudéa-Castéra.
Yara sa 1.4 billion euros (ukon P87.41-billion) ang gingasto agud nga malikawan nga magkadto ang mga higko sa suba, apang nagapaslawan gihapon ang amo nga suba nga makapasar sa water quality tests tubtub sa pagsugod sang Hulyo.
Nahibaluan nga sa amo nga suba nakatalana ang triathlon kag marathon swimming legs sang Olympics nga magasugod na sa Hulyo 26 tubtub sa Agusto 11.
