ILOILO CITY – Ginmanduan ni Iloilo City Mayor Jerry Treñas ang National Bureau of Investigation (NBI) kag Iloilo City Police Office nga tapnaon ang mga nagalapta nga financial scam.
Sa interview sang Bombo Radyo kay Mayor Treñas, iya ginpahayag nga ang nasambit nga scam ang pinaagi sa mga text message.
Suno kay Treñas, naghalin ang mga pagpangscam sa syudad sang Roxas kag sa subong, nagapamiktima naman sa syudad sang Iloilo.
Ginpaathag sang alkadle nga katuyuan sang lapnagon nga financial scam, amo ang pagganyat sa mga tawo nga mag-invest sang kwarta sa diin pagkatapos sang 30 ka-adlaw magadoble ini.
Ginpakamalaut man ni Treñas ang mga scammer kag nagmando sa publiko nga i-report sa mga otoridad kun may mabaton nga pagpangtonto.
