Wala sang handom nga indi sarang malab-ot.
Ini ang ginakabuhi kag padayon nga ginapamatud-an sang isa ka Ilonggo Overseas Filipino Worker, Fashion Influencer kag Nurse sa Dubai, United Arab Emirates.
Siya amo si Chris Daymon, isa ka fashion writer sang bantog nga Filipino designer nga si Michael Cinco, nagacollaborate sa mga supermodel sa Pilipinas kag naga-isahanon nga Ilonggo nga nagasulat sa isa ka Arabian Style Magazine sa diin nakalab-ot na sa nanuhay-tuhay nga pungsod kaangay ang South America kag Canada ang iya mga sinulatan kag hinimuan.
Sa interview sang Bombo Radyo kay Chris Daymon, iya ginpahayag nga umpisa sang nakagraduate siya sa kurso nga nursing sa University of Iloilo, didto na siya ‘nag start from scratch’.
Suno kay Daymon, sang nagpadulong kag nagtrabaho siya sa Manila, didto kag nakalantaw siya sang show ni Michael Cinco, sa diin indi pa man ini bantog nga fashion designer, nagapati na siya nga mangin madinalag-on ini sa diin ginhandom kag ginpanan-aw niya nga sa ulihe, mangin abyan man niya ini.
Gindumdom man ni Daymon ang tion nga nagalantaw kag nagabasa siya sang isa ka magazine sa diin nahambal niya sa iya kaugalingon nga maabot man ang adlaw nga mangin isa siya sa mga story contributor sang amo nga magazine.
Pahayag niya, kadungan sang iya paghandom, madamo sang mga nagkadlaw kag nagsiling sa iya nga imposible ang iya gina-ayam sa kabuhi.
Apang sa baylo nga patihan ang tanan nga negatibo nga komento nga ginhaboy sa iya, nagtinguha si Daymon kag nagpati nga masarangan niya lab-uton ang iya nga handom.
Nag-umpisa si Daymon sa pagsulat sang iya opinion, kag komentaryo sa social media sa diin siya nagpatok kag sa ulihe nadiskubrehan ni Michael Cinco ang iya mga sulat.
Sang nagpadulong siya sa Dubai, amat-amat nga nagbag-o ang iya nga kabuhi sa pihak sang tanan nga kabudlay nga iya ginpili nga atubangon kag lampuwasan.
Ang ginalantaw niya nga magazine sadto kun sa diin niya ginahandom nga mangin contributor, amo ang Arabian style magazine nga ginatrabahuan man niya subong sa diin siya lamang ang naga-isahanon nga Ilonggo nga ginhire.
Bag-o man siya nangin isa ka nurse, nangin isa anay siya ka sales person sa diin niya naagyan ang tanan nga pagpanghangkat tubtob nalab-ot ang ginatindugan niya subong nga kadalag-an.
Dugang pa niya, kun nalab-ot niya ang iya handom base sa pagtuo sa iya panan-awan kag gut instinct, indi man ini imposible para sa iban nga mga Ilonggo kaangay niya.
