Gin-report sang Bureau of Immigration (BI) nga ang Chinese national nga nadakpan sang nagligad nga semana bangud sa gina-alegar nga pagpang-espiya ang produkto gali sang institusyon nga ginapadalagan mismo sang Chinese military ukon People’s Liberation Army.
Ini nga Chinese nga naaresto sang Enero 17 amo si Deng Yuanqing.
Suno kay BI Commissioner Joel Anthony Viado, isa si Deng ka information technology specialist kag ang trabaho sini amo ang pagpangtipun sang mga impormasyon kaangot sa so-called infrastructures nga importante diri sa Pilipinas.
Pahayag pa ni Viado, gina-usisa pa kun ano gid ang matuod nga motibo sang foreigner nga nagpanugid man nga nagatinir na ini sa Pilipinas halin pa sadtong 2013 kag nagaguwa-sulod pa gani sa pungsod.
Kasado man ini sa isa ka Pinay kag may yara sang isa ka anak.
Matandaan nga sang nadakpan si Deng sang mga operatiba sang National Bureau of Investigation (NBI), kaupod sini ang mga Pinoy nga sanday Ronel Jojo Balundo Besa kag Jason Amado Fernandez.
Natabo ang pag-aresto sa condominium sa Makati City bangud sa alleged espionage activities sa key military and civilian infrastructure sa Pilipinas. Sang tion nga nadakpan sila, ginaalegar nga nagagamit sila sang sports utility vehicle nga may unod nga devices para sa espionage.
Suno sa NBI kag sa Armed Forces of the Philippines (AFP), ang nakuha nga equipment sa Chinese ang may masangkad nga military applications kaangay sang artillery and missile guidance amo man ang pagtumod sang capacity sang vehicle traffic sa areas kaangay sang sites nga ginagamit sa military exercises kag amo man sa Enhanced Defense Cooperation Agreement (EDCA) sites.
