Nadakpan na sang mga kapulisan sa Iloilo City subong nga gab-i ang ginaalegar nga suspek sa pagpang-hold up sa asawa ni Retired Police Colonel Cornelio Salinas.
Sa inisyal nga impormasyon, naaresto ini sa Barangay Bo. Obrero, Lapuz, Iloilo City.
Gindala na ini gilayon sa Iloilo City Police Office (ICPO). Ginahulat man ang dugang nga statement sang opisina kaangot sa identity sang suspek kag iban pa nga mga detalye sa pag-aresto sa iya.
Antes sini, naghatag si Mayor Raisa Treñas sang 48 oras nga deadline ang ICPO agud nga ma-resolba ang amo nga holdup incident nga natabo sa parking area sang SM City Mandurriao kagab-i.
Nauna naman nga nakapahayag si Salinas, nga subong head sang Iloilo Provincial Disaster Risk Reduction and Management Office (PDRRMO), nga masami nga isahanon nagapadulong ang iya asawa sa SM Mandurriao para mag-grocery.
Sang natabo ang insidente, nakasakay na ini sa iya salakyan sang may nagpalapit nga lalaki kag ginkuha ang iya kwarta nga ginabulubanta naga-lab-ot sa P30,000 kag ginlampusan sang armas sa agtang.
Gilayon ini nangayo sang bulig sa security guard sang mall, apang suno sa iya, wala sang immediate response nga natabo. Sa baylo, ang biktima pa ang nagtawag sa iya, kag si Ret. Col. Salinas pa mismo ang nagtawag sa police.
Ginpahayag man ni Salinas nga dapat masolbar ang kaso agud indi na ini matabo sa iban pa, kag ginpanawagan niya nga dapat ma-review ang security system sang mall. Dapat gilayon ini nga ma-evaluate sang Philippine National Police Supervisory Office for Security and Investigation Agencies (PNP SOSIA), Philippine Association of Detective and Protective Agency Operators (PADPAO), Civil Security Group, kag iban pa nga security agencies nga naga-deploy sang seguridad sa mga dalagko nga malls sa syudad.
Gindugang pa ni Salinas nga dapat ma-improve ang lighting system kag mabutangan sang mas madamo nga CCTV cameras sa palibot sang mall agud malikawan ang krimen.
Ginpanugyan man niya nga dapat i-restructure ang security set-up kag himuon ini nga security quadrant system imbes nga roving system lamang, kag dapat may yara man sang contingency and medical response.
Ginlaragway man sang retired colonel nga isa ini ka “near-death” experience para sa iya asawa, matapos nga gintayaan ini kag nakaangkon sang hematoma sa agtang tungod sang paglampos sang armas. #
(with reports from Bombo Bryan Gonzales and Bombo Phauline Pillora)
