𝗜𝗟𝗢𝗜𝗟𝗢 𝗖𝗜𝗧𝗬 — Magasunod ang Alliance for Peace Sustainable Development Transport Cooperative kon ano ang mangin desisyon sang gobyerno kaangot sa ginaduso nga suspensyon sang Public Utility Vehicle Modernization Program (PUVMP).
Sa interview sang Bombo Radyo kay Edgar Salarda, vice chair sang Alliance for Peace Sustainable Development Transport Cooperative, iya ginpahayag nga respetohon na lang sang kooperatiba kon suspendihon gidman ang modernisasyon.
Suno kay Salarda, wala naman sila sang sarang nga mahimo kon madayon ang suspensyon, apang sa subong, magahulat sila sang pinal nga desisyon ni Presidente Ferdinand Marcos, Jr. kon ini nga tikang ang iya nga pirmahan.
Ginalantaw man sini nga kon matigayon gidman ang suspensyon, magalawig lang ini sang isa ka tuig ukon mas malip-ot.
Nagapati man ang natungdan nga posible may mga kinahanglan lang nga i-revise sa modernization program sang gobyerno rason nga ginaduso sang senado ang suspensyon.
