Napaslawan ang Alas Pilipinas nga maka-abante sa masunod nga round sang 2025 FIVB Volleyball Men’s World Championship.
Ini matapos nalutos sa kamot sang world no. 16 nga Iran sa katapusan nga hampang sa pool stage kagab-i, Septyembre 18, nga naglab-ot pa sa five sets.
Sa 19-18 mark sang do-or-die set, nagtinumbo-tumbo na sa kalipay ang players, fans, pati ang coaches kag ang federation officials kasunod sang block ni Kim Malabunga nga naghimo sang skor nga 20-18.
Apang nagtawag ang Iran sang net touch challenge nga amo ang nagluwas sa ila sa match, 19-all.
Napatas pa liwat ni Bryan Bagunas ang hampang sa 20-all, apang nakuha na sang kasumpong ang upper-hand kag dalayon nga naka-abante sa knockout stage.
Ini ang debut sang Alas Pilipinas sa world stage, kag nakahimo sang maragtas sang na-upse sini sang nagligad nga gab-i ang Egypt nga world no. 21 sa ranking.
Nagsugod ang tournament nga pang-88 ang Pilipinas, apang nagsaka ini sa world no. 77 sa latest nga rankings.
Magluwas sa Iran, naka-abante naman sa playoff stage ang Tunisia nga lakip sa top two teams sa Pool A. Ang Tunisia amo ang naglutos sa Alas Men sa imbukada nga hampang nga kadungan man sang opening ceremony.#
