𝗜𝗟𝗢𝗜𝗟𝗢 𝗖𝗜𝗧𝗬 – Wala sang katupong nga kalipay ang nabatyagan sang alumnus kag part time teacher sang Iloilo Science and Technology University (ISAT U) matapos nagdaog sa prestihiyoso nga TernoCon 2025.
Ini amo si Peter Gagula nga kilala bilang si ‘Peach Garde’, tumandok sang Tapaz, Capiz.
Sa interview sang Bombo Radyo kay Garde, iya ginpahayag nga tuig 2017 sang nag-upod ini sa seminar workshop kag sang 2018, nag-umpisa na ang fashion show nga TernoCon.
Ang TernoCon ang isa ka nationwide competition sang mga “terno” sang nagkalain-lain nga mga fashion designers sa Pilipinas.
Suno kay Garde, nag-apply ini sa TernoCon 2020 kag 2023, apang wala ini nabaton.
Sang 2024, nagbukas liwat ang competition kag amo na lang ang kalipay sini nga nabaton na ini.
Sa ginpatigayon nga culminating cultural show sang Enero 26, 2025, si Garde ang nakakuha sang grand prize nga Pacita Longos Award.
Nagpanguna si Garde sa 12 tanan nga mga finalists sa diin apisar nga naghalin ini sa probinsya, ginpakita sini nga masarangan sini nga magpangibabaw sa kompetisyon.
Ang iya collection ang nagapakita sang 20th-century Philippine visual arts paagi sa tatlo ka distinct pieces: isa ka formal terno nga may pañuelo, isa ka formal Balintawak nga may alampay kag tapis, kag isa ka formal Kimona nga naga-feature sang butterfly sleeves nga may alampay kag patadyong.
Ginahalad naman ni Garde ang iya kadalag-an sa iya nagtaliwan nga iloy, partner, mentors kag mga estudyante sa ISAT U.
