ILOILO CITY – Nagpaandam ang isa ka political analyst sa posible mangin epekto sang away nanday House Speaker Pantaleon Alvarez kag Davao del Norte Rep. Antonio Floirendo sa Duterte administration.
Sa interview sang Bombo Radyo, ginpahayag ni Ramon Casiple nga apisar personal ini nga away sang duha ka mamalidha, dapat indi na ini pagpahanugutan nga maglab-ot sa punto nga maapektuhan ang relasyon sang mga ini sa pulitika.
Importante suno kay Casiple ang coalition para sa mga legislative agenda ni Presidente Rodrigo Duterte kag kun matabo, maapektuhan ang puwersa sang administrasyon sa Kongreso.
Apang nagpati si Casiple nga may mga behind the scenes nga ginahimo ang Presidente agud mag-referee sa duha sini ka mga kaalyado kag mga kasimanwa.
Ginpahayag ni Casiple nga indi naman katingalahan kun may mga babaye ang House Speaker, bangud nga indi naman ini bag-o suno sa iya, para sa mga pulitiko.
Ang kinalain lang suno sa political analyst nga ang iban ginatago, samtang si Alvarez naman nag-ako rason nga front page ang iskandalo sini.
Apang wala na dapat sang double standard bangud bilang ika-tatlo ka pinakamataas nga opisyal sang pungsod, dapat magsunod sa mga rules kag laye ang opisyal.