𝗜𝗟𝗢𝗜𝗟𝗢 𝗖𝗜𝗧𝗬 — Nagapati si Alyas “Buknoy” nga may natabo nga pustahanay kag indi mahimo nga wala sang pustahanay sa ila nangin hampang sa billiard ni Jaybee Sucal sa Brgy. Bolilao, Mandurriao, Iloilo City.
Sa interview sang Bombo Radyo kay Alyas Buknoy, gin-athag sini nga wala sang may natabo nga raid antes paman natabo ang pagwasa-ag sang mga tumalan-aw.
Suno kay Buknoy, isa lamang ka exhibition game ang ila hampang ni Jaybee Sucal ukon mas kilala nga “Young Magician” kag sila ang gin-imbitaran lamang sang tag-iya sang bilyaran.
Ginpahayag man sini nga may yara sila sang talent fee nga ginahatag sang mga organizer apang wala ini nahatag sa ila matapos ang natabo nga pagkinagual, kon sa diin, nagresulta sa patas nga hampang.
Ginkadismaya man sini nga wala natapos ang hampang bangud wala natumod kon sin-o ang nadaog sa ila nga tumalagsahon nga sambuwa ni Sucal.
Nahibaluan nga ini ang labing-una nga tinion nga nagpadulong sa Iloilo si Jaybee Sucal agud nga magsumbuwa kay alyas Buknoy sa patag sang billiard.
Gin-athag naman sang Iloilo City Police Office (ICPO) nga para sa kaayohan sang talatapan kag ni Police Captain Nonito Venteroso Jr. ang pag-relieve sa iya bilang hepe sang Iloilo City Police Station 10.
Suno kay Police Colonel Joeresty Coronica, outgoing Director sang Iloilo City Police Office, may ideya na nga daan si Venteroso Jr. nga siya ang iga-relieve sa pwesto kag pagatal-osan ni Police Lieutenant Colonel Rene Obregon.
Wala naman nagsabat si Coronica kon may kaangtanan ang nangin desisyon sang talatapan sa pahampang sa bilyaran sa Brgy. Bolilao, Mandurriao, Iloilo City nga una ginduso ni Venteroso nga paimbestigaran.
Nagalaum naman ang natungdan nga ang nabilin nga trabaho ni Venteroso sa Iloilo City Police Station 10 ang ubrahon ni Police Lieutenant Col. Obregon nga wala nagasako kag dekalidad.
