Apisar naga-recover pa lang sa knee injury, ginhingadlan na si Alyssa Valdez bilang team captain sang Pilipinas sa women’s indoor volleyball sa 32nd Southeast Asian (SEA) Games sa Cambodia sa masunod nga bulan.
Sandig sa anunsyo sang Philippine National Volleyball Federation, mangin kaupod ni Valdez ang iya teammates sa Creamline nga sanday Jia Morado-De Guzman, Kyla Atienza, Celine Domingo, Jema Galanza, Tots Carlos, kag Michele Gumabao.
Matandaan nga bangud sa injury sini nga naangkon sang Disyembre, wala nakahampang si Valdez sa sambuwa sang Cool Smashers sa finals sang bag-o lang nagtakop nga Premier Volleyball League All-Filipino Conference kun sa diin Creamline man ang nakakuha liwat sang kampyeonato.
Ginpahayag man sang three-time PVL Most Valuable Player nga nakibot man siya nga siya ang ginhingadlan nga team captain, apang nag-inspire ini sa iya nga mag-paayo gid agud 100% ang iya mahatag sa hampang.
“You don’t wanna go there if you are not 100% so that’s my motivation. And honestly, I’m happy to be not just to be the captain, but to be part of the national team,” pahayag ni Valdez.
Kaupod man sa team sanday Maria Angelica Cayuna kag Glaudine Troncoso sang Cignal; Kathleen Faith Arado kag Dell Palomata sang PLDT; Cherry Rose Nunag kag Katrina Mae Tolentino sang Choco Mucho; kag Mylene Paat sang Chery Tiggo.
Target sang national team nga makasulod sa Top 3 sa Southeast Asia Games subong nga tuig nga kun matabo amo ang una nga bes halin sang nagtapos bilang third placer sang 2005. ##
