Amay gin-hostage ang iya mag-iloy, nagtuyo mag-suicide sa presuhan

ILOILO CITY – Gin-hostage sang isa ka lalaki ang iya live-in partner kag isa ka tuig nga bata nga lalaki sa Sitio Marikudo, Brgy. Malandog, Hamtic, Antique.
Sa interview sang Bombo Radyo Iloilo, ginpahayag sang hepe sang Hamtic Municipal Police station nga si Police Inspector Josefe Bene, nga nagdugay sang masobra isa ka oras ang hostage drama antes na-pacify ang suspek nga si Roland Colombres Sr.
Sa pagpangusisa sang mga otoridad, naglagaw sa amo nga lugar ang mag-live-in partner upod ang ila bata halin sa ila puluy-an sa San Remegio, Antique agud magtambong sa isa ka kahiwatan.
Suno kay Inspector Bene, nasat-uman sang mga himata niya nga naglain ang giho ni Colombres matapos nga nag-inom-inom kag didto na gin-hostage ang iya asawa kag bata nga lalaki.
Sa sobra nga isol sang suspek, natumba ang dingding sang banyo nga ginasandigan sini kag nagdiretso gid sa basin.
Sang gintuyo nga magpalagyo sang iya asawa, ginbuno sang suspek ang live-in partner nga nag-angkon sang pilas sa dughan amo man ang ila anak.
Gilayon man nga gindala sa ospital ang mga biktima.
Samtang yara sa sulod sang karsel ang suspek, naglaslas ini sang li-og gamit ang ginapahayag kahoy nga may lata ukon botelya.
Suno kay Bene, nagakahangawa ang suspek nga balikan sang iya mga utod kag katiyuan rason nga gintuyo sini nga magpanginmatay.
Lunsay yara na sa hilway nga kahimtangan ang mga biktima kag ginpaidalom naman sa hospital arrest ang suspek.