ILOILO CITY- Patay ang isa ka anak nga babaye matapos ginhatok- hatok labo sang iya amay sa Sagay City, Negros Occidental.
Ang biktima amo si Roselyn Sulan, 25 samtang ang suspek amo si Richard Sulan,52, lunsay residente sang Purok Kawayanan, Barangay Rafael Barera sa amo nga syudad.
Suno sa Sagay City Police Station, nagainom- inom ang amay sang hinali lang nga ginsulod sang iya bata kag ginsundan sang pagbinaisay.
Nagpulot sang bato ang anak kag may bitbit pa ini nga espading kag ginhangkat sang away ang iya amay.
Gintuyo pa nga punggan sang iya utod ang babaye apang ginsaruso gid ini ang iya amay.
Didto na nagkuha sang binangon ang amay kag ginlabo ang iya anak sang makapila ka beses.
Nag-angkon ang biktima sang pilas sa ulo kag iban ng parte sang lawas kag nautod pa ang kamot sini.
Nagsungka naman ang amay sa otoridad kag natalana nga pasakaan sang kaso nga parricide.
