Patay ang 41-anyos nga amay matapos nga ginlampusan sang duha ka lalaki sa Brgy. Namocon, Tigbauan, Iloilo.
Ang biktima amo si Reymond Dilig Tuburan, kasado, panday, samtang ang suspek amo si Romvic Tumalaytay, legal ang pang-edaron, lunsay residente sang nasambit nga barangay.
Ang isa naman ka suspek ang padayon naman nga gina-identify sang kapulisan.
Sa interview sang Bombo Radyo kay Police Captain Alfred Mansoy, Officer-In-Charge sang Tigbauan Municipal Police Station (MPS), iya ginpahayag nga halin sa highway ang biktima angkas ang iya lima ka tuig nga anak.
Sang malapit na sa ila balay, ginlambatan sila sang duha ka lalaki kag ginlampusan sang ginabulubanta 3 ka tapak nga kalabaon nga kahoy kun sa diin, nakita ini tanan sang iya anak.
Natigayon naman nga madakpan ang suspek matapos nga nagsungka ini sa kapulisan halin sa balay sang iya amigo sa Parara Norte, Tigbauan kag pag-identify sang 5 ka tuig nga bata sang biktima.
Hugot naman nga ginapanginwala sang suspek nga gin-ubra sini ang krimen.
Padayon sa gihapon ang imbestigasyon sang kapulisan kag pag- identify sa isa pa gid sini ka kaupod.
