ILOILO CITY – Isa ang patay sa away sa duta sang pamilya sa banwa sang San Enrique, Iloilo.
Sa interview sang Bombo Radyo Iloilo, ginpahayag ni SPO1 Jason Sopio sang San Enrique Municipal Police Station nga ginpaarakan sang luthang ang biktima nga si Adonis Alada de Dios, 36, pumuluyo sa nasambit nga banwa.
Ang mga suspek amo ang mag-utod nga Efren Alada, 60, kag Henry Alada, 52, nga mga tiyo man lang sang biktima.
Duha ka igo sa dugan, duha sa tiyan kag isa sa tiil, ang naangkon sang biktima.
Suno sa mga otoridad, mismo sa atubang sang iya mga anak nga 22-anyos kag 15-anyos, ginpatay ang biktima.
Ginpahayag ni SPO1 Sopio nga madugay na nga naga-away may kaangtanan sa duta, ang biktima kag mga suspek.
Gilayon naman nga nagpalagyo ang mga suspek.