Patay ang amay kag duha niya ka mga anak nga sakay sang motorsiklo matapos sila mabungguan sang nagadalagan nga bus samtang nagatabok sa Maharlika National Highway sa Brgy. Laboy, Matnog, Sorsogon.
Dead-on-the-spot ang 41-anyos nga amay nga si Noel, nga amo ang nagamaneho sang motorsiklo kag nagtabug ini sa sulod sang compound sang isa ka gasoline station, samtang ang 2-anyos niya nga anak patay nga nakit-an sa drainage canal sa kilid sang highway, kag ang 17-anyos nga si Angelica, duguan kag lipong nga nasapwan man sa kilid sang highway.
Suno sa report, nagasakay ang mag-amay sa ila motorsiklo kag nagpatughong sang gasolina sa amo nga lugar.
Apang paghalin nila sa gasolinahan kag manugtabok sa highway, ginbungguan sila sang de-pampasahero nga bus sang Elavil Bus Lines nga may plakang NFU-5001 kag ginamaneho ni alyas “Caloy.”
Bangud sa kabaskug sang pagkabunggo, nagtabog sa malayo ang tatlo kag gin-arado pa sang bus ang ila motorsiklo sang kapin 20 ka metros.
Gindala naman sa pinakamalapit nga ospital ang bata nga si Angelica apang ginbawian man sang kabuhi samtang ginabulong.
Nahibaluan nga magakuha kuntani si Angelica sang medical certification para sa iya pag-eskwela sa kolehiyo sang natabo ang aksidente.
Ginhunong na sang Matnog Police ang driver sang bus kag magaatubang sang kaso nga reckless imprudence resulting in multiple homicide kag damage to property.
