Nasapwan nga patay ang mag-amay nga ginapatihan gintiro sa sulod mismo sang ila nga balay sa Barangay San Roque, Tapaz, Capiz.

Ang mga biktima amo sanday alyas “Jun,” 58-anyos, kag bata sini nga si alyas “Mar,” 26-anyos, isa ka Person with Disability (PWD).

Suno sa Tapaz Municipal Police Station, aga sang Hulyo 28, nagpadulong sa balay sang mga biktima sanday alyas “Tile” kag alyas “Ron,” mga BPAT member agud hambalan si “Jun” angut sa ulubrahon sa bukid.

Nakit-an sang mga ini nga may mga dugo sa idalom sang balay.

Gilayon nga ginpahibalo nila ini sa kapulisan.

Sa pagpadulong sang kapulisan, nasapwan ang mga biktima nga nagahigda sa sulod sang ila nga balay kun sa diin si alyas “Jun” ang may igo sang bala sa ulo, samtang si alyas “Mar” ang may igo sa nawong.

Narekober sa crime scene ang duha ka basiyo sang bala kag isa ka slug sang kalibre .45 nga armas.

Padayon pa ang imbestigasyon sa krimen.