ILOILO CITY – Dakop sa drug-buy bust operation ang isa ka E-bike driver kag duha sini ka mga bata sa drug buy bust operation sa Barangay Muelle Loney-Montes, Iloilo City Proper.
Ang mga nadakpan amo sanday Alyas Manok, 64, kag mga anak sini nga sanday Alyas Dilo, 42, kag Alyas Boy-boy, 44, lunsay mga residente sa nasambit nga barangay.
Sa interview sang Bombo Radyo kay Police Captain Roque Gimeno III, hepe sang Iloilo City Police Station No.1, iya ginpahayag nga nag-umpisa ang monitoring sa mga durugista humalin pa sang nagligad tuig sa diin ang main subject gid amo ang ila amay.
Suno kay Gimeno, nagakatabo ang transaction sang mga ini sa sulod mismo sang ila balay.
Naaktuhan man ang mga ini sang otoridad nga nagapatigayon sang pot session malapit sa mga menor de edad nga mga kabataan.
Nakuha sa posisyon sang mga ini ang ginabanta 80 grams sang suspected shabu nga nagabalor sang masobra P500,000.
Sa subong, preso na ang tatlo sa Iloilo City Police Station No.1 kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
