DUMANGAS, ILOILO – Indi hungod.
Ini ang pahayag sang isa ka amay nga nakabuno-patay sa kaugalingon nga anak sa Brgy. Pulao, Dumangas, Iloilo.
Sa interview sang Bombo Radyo sa suspek nga si Leandro Gabica, 50 anyos, iya ginpahayag nga tuyo lang kun tani niya nga bulagon ang nagapukutay nga mga anak.
Antes pa man nabun-an ang biktima, ginpahayag sang amay nga Gabica nga akig na ang iya anak nga si Levi June, 27 anyos bangud lamang sa scrap nga rim sang motorsiklo nga ginapanag-iyahan na sang manghod nga si Lester, 25 anyos.
Suno kay Gabica, bisan siya nga padre de pamilya ang wala na ginataha sang iya anak nga si Levi June samtang yara sila sa scrapan.
Pagkatapos ang pag inum-inom kaupod sang iya umagad sa ila balay, ginpahayag sang amay nga nagtulog na siya kag iya na lang nga nabugtawan nga nagapukutay na ang biktima kag ang manghod nga si Lester.
Ginpahayag sang amay nga iya ginsaway ang anak nga si Levi June nga may yara sang dala nga kutsilyo.
Bangud nga nadagdag sa duta ang kutsilyo, ginpahayag sang amay nga iya ini nga gin-agaw kag ginbuno si Levi June nga indi magpasaway.
Gindala pa sa hospital ang biktima apang wala na natabangan pa.
Ang mag-amay nga Leandro kag Lester ang preso sa Dumangas Municipal Police Station.
