Nagsungka na sa kapulisan ang amay nga nagbuno patay sa anay live-in partner sang iya menor-de-edad nga bata sa Barangay San Juan, Molo sang tinalikdan nga adlaw.
Ang biktima ang ginkilala kay Alyas Toto, 26, samtang ang suspek amo si alyas Puyo 42, kag lunsay residente sang nasambit nga lugar.
Sa interview sang Bombo Radyo kay PCpt. Ryan Christ Inot, Officer-in-Charge sang Iloilo City Police Station 4 (ICPSPCpt. Ryan Christ Inot, Officer-in-Charge sang Iloilo City Police Station 4 (ICPS4)4), iya ginpahayag nga antes nagsungka ang suspek nakabaton pa sila sang impormasyon nga padulong ini sa boundary sang San Joaquin kag Antique.
Bangud sini, gilayon nga gin-monitor sang mga otoridad tubtob nga nakig-angut ang asawa sini sa kapulisan kag nabuligan nga mapasungka ang suspek.
Suno kay Inot, gintuad sang suspek nga wala siya sa insakto nga paminsaron sang nahimo sini ang krimen, tuga sang tuman nga kaakig.
Dugang pa, nahimo lamang ni Alyas Puyo nga patyon ang live in partner sang iya bata bangud masami niya ini nga ginasakit.
Bilang amay suno sa iya, indi niya maagwantahan nga makita nga masami nalang ginasakit ang iya bata ilabi na nga ini isa ka menor de edad pa lamang.
Pahayag pa sang natungdan, wala man naghinulsol ang suspek sa iya ginhimo nga pagpatay bangud suno sa iya ginaproteheran lang sini ang iya bata, sa diin ginsiling pa niya nga wala gid kaagi patupa halin sang gamay pa ini.
Sa subong, yara na sa kustodiya sang ICPS4 ang suspek kag ginahanda na ang kaso nga murder, samtang ginahulat pa ang desisyon sang pamilya sang biktima kun magpasaka ini sang kaso batok sa iya.
