Nagpanindugan ang amay nga suspek sa stabbing incident sa Barangay East Baluarte, Molo, Iloilo City nga wala siya sang partisipasyon sa krimen.
Sa interview sang Bombo Radyo kay Eliseo Zalabate nga naka-detain na subong sa police station sa amo nga distrito, ginpahayag sini nga lunsay alegasyon lang sa pihak nga kampo ang statement nga nagsulod man siya sa balay sang mag-asawa kag ginhawiran ang lalaki nga biktima.
Suno kay Zalabate, nagakatulog na siya sang amo nga gab-i kag ginpukaw lang siya sang nagpauli ang iya bata nga si Erwin agud magkuha sang kutsilyo.
Pahayag sini, naglagas matuod siya sa iya bata, apang ang iya tuyo amo nga punggan ini bangud indi man niya ini luyag mangin criminal.
Gindugang man sini nga nadala pa niya pauli si Erwin kag nagtuyo pa nga magtawag sang pulis, apang gin-alegar nga madasig ini nga nagpalagyo.
Wala man sang nasugid si Erwin sa iya ginikanan kun ano ang atraso sang mag-asawa, apang posible suno kay Eliseo nga na-impito ang iya bata bangud masami nga naga-video ang mag-asawa sa ila nga mga nagatambay sa dalan.
NA-FILE NA ANG COMPLAINT
Ginkumpirma naman sang Iloilo City Police Station 4 nga nagpahibalo si Erwin nga magasungka ini.
Sa interview sang Bombo Radyo kay Police Captain Ryan Christ Inot, hepe sang estasyon, iya ginpahayag nga antes pa man nagtawag si Erwin Zalabate sa iya pamilya agud kuntani mag-surrender, na-file na nila ang panumbungon.
Suno kay Inot, indi naman nila mahimo madakop ang suspek bangud nga nagtakop na ang hot pursuit operation.
Sandig sa procedure suno sa police, hulaton na lang nga magpaguwa ang korte sang arrest warrant kasunod sang complaint nga frustrated homicide, kag pananglitan ma-isyu na ang warrant, arestuhon ang lalaki.
Ginpahayag man ni Inot nga sa area sang Tapaz, Capiz nagpalagyo ang suspek matapos ang nagluntad nga stabbing incident.
Kun balikan, ang mga biktima sa pagpamuno amo sanday Rolando, 58 anyos, kag iya asawa nga si Fatima, 54 anyos, lunsay residente man sang Barangay East Baluarte.
Ginpahayag nga ginsulod sang mga suspek ang puluy-an sang mga biktima samtang nagakatulog ang mga ini kag gipangbuno. Matapos ang krimen, natigayon nga makapalagyo ang anak nga suspek samtang nadakpan naman ang amay sini.
