Nagapati si Samuel Diergos, amay ni Claire, nga may kaangtanan sa negosyo ang motibo sa likod sang brutal nga pagpatay sa iya nga anak.
Sa interview sang Bombo Radyo sa amay, iya ginpahayag nga binulan man siya nga nakatinir sa balay sang iya anak sa Deca Homes Subdivision sa Pavia, Iloilo kag masami nga may nagapadulong diri nga ka-transaksyon man sini sa trabaho.
Ginpahayag ni Samuel nga kilala man niya ang iban nga kaupod ni Claire sa iya nga negosyo.
Nagatrabaho si Claire bilang distributor sang food supplement, vitamins, kag iban pa nga herbal products.
Suno kay Samuel, nakapanugid anay ang iya anak nga may ipa-barangay ini nga tawo.
Ginapahayag sulukton ni Claire ang amo nga tawo kag nakabais pa mismo sa subdivision. Magluwas diri, wala na sang nasugid pa si Claire nga problema sa ila nga balay. Domingo, ‘las otso sa gab-i, sang katapusan ini nga naka-kontak sa iya nga iloy apang naglisensya man nga mapahuway na gilayon bangud nakapoy na.
Sa bahin sang special investigation team sang Iloilo Police Provincial Office (IPPO), Sta. Barbara kag Pavia Municipal Police Stations, tatlo ka anggulo ang ginasundan sa pagpatay sa biktima: robbery with homicide, jealousy ukon pagpangimon, kag utang nga kwarta. ##
