ILOILO CITY – Patay ang isa ka amay matapos ginpulihan buno sang nagsulong sa puluy-an sang lalaki nga ginapasuni nagtapungol sa iya anak sa Barangay Simsiman, Calinog, Iloilo.
Ang biktima amo si Willy Lebuna, 45, kag residente sang nasambit nga barangay.
Ang mga suspetsado naman amo sanday Julius Cabarles, Felix Ragas Jr., kag Nilo Daquita, legal ang mga edad kag lunsay residente sang amo man nga lugar.
Sa interview sang Bombo Radyo kay Police Major Myles Dieron, hepe sang Calinog Municipal Police Station, iya ginpahayag nga nagpauli ang anak sang biktima nga 16-anyos kag nagpanugid nga gintapungol ni Cabarles.
Gilayon nga ginsulong sang amay si Cabarles sa iya balay dala ang 12-gauge shot gun upod ang iya nga anak nga may dala man nga binangon.
Dugang pang sang natungdan, sang yara na sila sa puluy-an sang suspetsado, may natabo nga pagbina-isay tubtub nga naggwa sa ila balay si Juluis kag si Ragas nga may dala man nga balakol kag wasay.
Samtang nagabina-isay ang magtimbang nga bahin, hinali nga naggwa man sa ila balay si Daquita kag may dala nga binangon, ginpalapitan ang biktima kag gin-agaw ang dala sini nga armas luthang.
Antes pa man nakuha ang armas sa biktima, natigayon pa niya nga maluthang si Ragas nga naka-angkun sang pilas sa kilid nga bahin sang lawas.
Kasunod sini, nagpalapit man si Daquita kag gintinguha-an nga agawon sa biktima ang armas apang mangin siya ang natiruhan.
Sang ulihi, natigayon nga makuha ang armas nagikan sa biktima kag sunod ini nga ginpulihan kastigo kag labo sang mga suspek nga amo ang gintuna-an sang iya kamatayon.
Sang nakita naman sang 16-anyos nga biktima nga ginpulihan ang iya amay, ginpanglabo man sini ang mga suspek.
Sa subong, preso na si Daquita sa Calinog Municipal Police Station samtang padayon nga ginabulong sa ospital ang duha pa ka mga suspek.
Yara naman sa kustodiya sang Municipal Social Welfare and Development- Calinog ang 16-anyos nga anak sang biktima.
