BATAD, ILOILO – Ginakabig nga role model sang 20 anyos nga estudyante ang iya nga amay nga pastor sa Batad, Iloilo.
Sa interview sang Bombo Radyo kay Shekinah Joy Bandojo, iya ginpahayag nga tuman ka ”sweet” ang iya amay indi lamang sa ila nga mag-utod kundi amo man sa ila nga iloy.
Wala sang adlaw suno kay Shekinah nga wala sang kape sa ibabaw sang lamesa kada magbugtaw ang iya nga iloy.
Ina tungod sa iya nga amay nga si Denny Bandojo nga tuman ka mapinalanggaon kag may himpit nga pagtuo sa Diyos.
Suno kay Shekinah, supportive man nga sahi sang lalaki ang iya amay sa diin kun mag intra ini sa mga pageants, ang iya amay man ang nagapangita sang iya gown nga masuksok.
Nakibot naman si Denny Bandojo nga yara lang sa pihak nga linya ang iya anak samtang nagahatag sang mensahe sa iya.
Suno kay Denny, nagakalipay siya bangud madamo ang nag greet sa iya subong nga Father’s Day.
Nagapangamuyo kag nagapasalamat man si Denny sa Diyos nga matawhay ang ila panimalay kag malipayon ang iya tiayon kag mga kabataan.
