Ginpanginwala sang amay sang lalaki nga nasapwan-patay sa isa ka kanal sa Barangay Sta. Rita, Oton, Iloilo nga wala siya sang kahilabtanan sa kamatayon sang iya anak.
Ang biktima amo si Raymundo Sarad, Jr., 36-anyos, residente sang nasambit nga lugar.
Sa interview sang Bombo Radyo kay Raymundo Sarad, Sr., amay sang biktima, iya ginpahayag nga magkaupod sila sang iya anak nga nag-inom sa balay ni Alyas Bunis kon sa diin, nagalagohanay pa sila sa amo nga tion.
Suno kay Sarad, manog alas-dose sang kagab-ihon sang nag-una siya nga nagpauli sa ila balay.
Gintuad man sini nga nakibot na lamang siya sang ginpukaw siya sa ila balay agud ipahibalo nga nasapwan ang iya anak sa kanal kaina sang aga.
Ginbuyagyag man sang amay nga ang black eye nga makit-an sa iya nawong ang nakabunggo lamang kag wala ginsumbag sang iya anak.
Ginpahayag man ni Sarad nga lunsay nga hubog sila sang iya anak kagab-i kag wala nakabaisay.
Wala man sini ginkatingala kon ngaa wala nakapauli sa ila puluy-an ang iya nga anak.
