ILOILO CITY – Ginkumpirma sang Jaro Police Station nga natumod sang ila talatapan kun sin-o ang amay sang nawigit nga fetus sa boundary sang Barangay Montinola kag Our Lady of Lourdes, Jaro, Iloilo City.
Sa interview sang Bombo Radyo kay Police Executive Master Sergeant Cesar Pinuela, community relations officer sang Jaro Police Station, iya ginpahayag nga kaupod nila ang amay sang ginmisahan kag ginlubong ang fetus nga ginkilala nga si Baby Ycoy.
Suno kay Pinuela, may yara sang kapid si Baby Ycoy.
Posible suno sa iya nga nagpanic ang amay sang nakit-an nga patay na si Baby Icoy rason nga ginsulod ini sa botelya sang dextrose kag ginsugo ang isa ka pedicab driver nga ilubong sa patyo.
Una na ginpahayag sang mga barangay officials sa Our Lady of Lourdes nga isa ka lalaki halin sa West Visayas State University Medical Center ang nagsugo sa pedicab driver nga ilubong ang fetus sa patyo apang nawigit ini sa dalan.
Nagpanawagan man si Pinuela sa mga pigado nga pumuluyo nga may kaangay sini nga sitwasyon nga magpakig-anot sa ila talatapan agud mahatagan sang disente nga lubong ang ginbawian sang kabuhi nga mga kabataan.
