ILOILO CITY- Nagasinggitan sang hustisya ang pamilya sang Sangguniang Kabataan Chairman nga gin-ambush upod sang Barangay Kagawad sa Brgy. Mayang, Tubungan, Iloilo.
Sa exclusive interview sang Bombo Radyo kay Glecerio Bunda, amay ni Glenn Bunda, 24, Sangguniang Kabataan (SK) Chairman sang Barangay Tagpuan, Tubungan, iya ginpahayag nga wala siya nagalaum nga madangatan sang iya anak nga brutal nga ginpatay.
Suno sa amay, isa ka mabuot nga sahi sang anak ang SK Chairman.
Wala man nakapanugid ang iya anak nga nagatrabaho ini bilang installer sang solar panel kaupod ang gin-ambush man nga si Barangay Kagawad Harold Tablazon,33, sang Ago, Tubungan.
Hugot ang pagpati niya nga naulamid lang ang iya anak sa nasambit nga ambush.
Nagpanawagan man ang amay sa Tubungan Municipal Police Station sa pagpanguna ni Pol. Lt Jose Rommel Samson nga madakpan ang mga suspek nga nagpatay sa iya anak.
