Natukiban nga isa ka empleyado sang Department of Education kag nagatudlo sang child safety sa General Santos City ang amay sang 16-anyos nga Grade 9 student nga suspek sa pagpangluthang sa Banga National High School sa South Cotabato, kahapon nga adlaw, Setyembre 18.
Sa interview sang Bombo Radyo kay Banga Mayor Albert Palencia, iya ginpahayag nga ginapanag-iyahan mismo sang amay sang estudyante ang armas nga ging-gamit sini sa pagpangluthang sa eskwelahan kun sa diin may ara sang napatay kalakip na ang iya kaugalingon kag pila man ka mga nasamaran.
Suno sa alkalde, ginatago man kuntani sang amay sang menor de edad sa vault ang iya armas, apang hungod ini nga gin-guba sang suspek kag gindala ang pusil sa eskwelahan nga ging-gamit sini sa pagpangluthang.
Ginpakigbahin man sang alcalde nga base sa impormasyon nga ginhatag sang adviser sang estudyante, plano pa kuntani sang iloy sini nga ipaidalum sa psychiatric examination ang iya anak bangud sa ginapakita sini nga malain nga batasan.
Suno pa sa alcalde, isa man sa ginalantaw nga rason sang eskwelahan sa nangin insidente amo ang naagum nga manubo nga grado sang suspek nga 76.
Nahibaluan nga antes ini nga school shooting incident sa South Cotabato, may mga na-rekord man nga kaangay nga insidente sa sulod sang mga eskwelahan sa Pilipinas subong nga 2026.
Matandaan nga may shooting incident man sa San Jose National High School sa Tacloban sang Hunyo 22 kag sa Ateneo de Zamboanga University sa Zamboanga City sang Agosto 18.
