Haligi nalang kag wala na sang atop ang nabilin sa balay sang isa ka nasunugan sa nagluntad nga sunog kagina sang kaagahon.
Nahibaluan nga nagluntad ang sunog sa Barangay West Habog-Habog kag Barangay San Juan, Molo, Iloilo City subong nga aga.
Ginabulubanta nga masobra 200 ka mga panimalay ang naapektuhan sang sunog
Sa interview sang Bombo Radyo kay Oscar Ventura, isa ka amay nga nasunugan, iya ginpahayag nga nadala sa sunog ang kinabudlayan niya nga mga appliances kaangay sang TV.
Suno sa iya, nakabitbit pa siya sang pila ka mga bayo, kag de rasa nga mga manok.
Dugang pa sang natungdan, sa walo niya ka mga de rasa nga manok, tatlo lang ang nakasalbar.
Dako man ang iya pasalamat bangud wala sang nasamaran sa iya pamilya.
