Ginpatay sang tropa sang Russia ang isa ka American journalist nga yara sa Irpin, Kyiv region sa Ukraine.
Ginkilala ang biktima nga si Brent Renaud, 50, nga nagtrabaho anay sa New York Times.
Suno sa statement sang The Times, isa ka talented photographer kag filmmaker ang lalaki nga naka-contribute sa The New York Times sa sulod sang malawig nga mga tinuig.
Apang suno sa The Times, wala ini gin-assign sang amo nga media company para sa coverage sa Ukraine apisar nga nakasuksok ang biktima sang Times press badge sang adlaw nga ginpatay ini.
Sandig naman sa anunsyo sang police department sang Kyiv, ginpatay ang amo nga American freelance filmmaker samtang nagahanda nga mag-film sa mga refugees nga nagatabok sa border sa amo nga pungsod.
Suno sa pulis, nagasakay si Renaud sa salakyan kaupod ang iban pa nga journalists sang nagpalupok ang Russian troops. May yara pa sang isa ka napilasan nga journalist nga wala man ginhingadlan. ##
