ILOILO CITY – Nanggamo ang isa ka American national matapos nga ginbalibaran sang isa ka commercial sex worker sa MO2 bar sa Benigno Aquino Avenue, Mandurriao, Iloilo City.
Ginreklamo sang commercial sex worker nga si Carmela ang foreigner nga nakilala lang niya sa pangalan nga Albert matapos sila gintayaan sang armas.
Ginsaysay ni Carmela sa Bombo Radyo nga nakilala sini si Albert sa bar kag na-love at first sight sa American apang wala mahibaluan kun ano ang bug-os nga pangalan sang lalaki.
Nagsugtanay ang duha nga magkadto sa lodging house apang sang ginlantaw ni Carmela ang kaheta sang American, nakit-an sini nga P500 lang ang kwarta rason nga nagpamalibad ang sex worker bangud wala sang inugbayad si Albert.
Suno sa sex worker, naakig ang American kag ginhigkuan pa ang ginasakyan nila nga taxi kag gintayaan sila sang armas.
Sa kahadlok naglakat na lamang sila kag nagdiretso sa police station agud magreklamo samtang wala naman madakpan ang American national.