Ginpalawig sang Pag-IBIG ang amortization period sang Multi-Purpose Loan para mabuligan ang mga myembro sa tunga sang COVID-19 pandemic.
Sa interview sang Bombo Radyo kay Ronnie Abelo, Western Visayas Area Head sang PAG-IBIG, iya ginapahayag nga kun sang una, duha lang ka-tuig ang term para sa Multi-Purpose Loan, subong ginhimo na ini nga tatlo ka-tuig.
Suno kay Abelo, ini nga tikang sang ahensya ang kasunod sang panawagan sang mga myembro sang ahensya kag mangin ni Presidente Rodrigo Duterte.
Agud maka-apply sang Pag-IBIG Fund Multi-Purpose Loan, nagakadapat nga may yara ang isa ka myembro sang ”at least 24 monthly saving ukon contributions.”
Sa interview sang Bombo Radyo kay Gina Lanceta, head sang PAG-BIG sa Plazuela de Iloilo branch, iya ginpahayag nga mahimo nga maka-loan ang isa ka myembro tubtob sa 80 percent sang kabilugan niya nga natipon sa idalom sang Pag-IBIG Regular Savings nga ginabug-usan sang iya ginahulog kada bulan, counterpart nga ginahulog sang employer (kun employed), kag dividend nga ginahulog kada tuig.
Sa tion nga mabaton sang ahensya ang loan application kag ang kompleto nga requirements halin sa member ukon employer, mahimo na nga mabaton ang loan sa sulod sang 7 tubtob 20 ka-adlaw.
Para naman sa mga may existing Pag-IBIG Fund Multi-Purpose Loan, mahimo sa gihapon maka-apply sang Calamity Loan PROVIDED nga updated ang pagbayad sa existing loan kalakip na sa Pag-IBIG Fund Housing Loan.
Nagakadapat naman nga sundon sang isa ka member ang proseso sang Pag-IBIG agud maka-apply.
Sa interview sang Bombo Radyo kay Mary Faith Poylan, head sang Pag-IBIG sa Molo, Iloilo City Branch, iya ginpahayag nga bangud sa kahangawa nga dala sang COVID-19, sundon lang ang mga masunod nga rekomendasyon sa pag-apply sang Multi-Purpose Loan ukon Calamity Loan:
- Magdownload sang Multi-Purpose Loan ukon Calamity Loan application form halin sa Pag-IBIG Fund website. I-print ini, fill-upan ang kinahanglan nga impormasyon kag pirmahan sa diin nagakadapat may pirma man ang duha ka witnesses;
- I-scan ukon picturan agud mapadala sa authorized representative, Fund Coordinator ukon Human Resource (HR) Department sang kumpanya nga ginatrabahuan. Sila man ang maga-print sini agud pirmahan ang Application Agreement portion. Matapos mapirmahan, sila man ang maga-scan ukon maga-picture agud mapadala balik sa empleyado;
- I-scan ukon picturan ang ang isa ka valid ID, Landbank, Cashcard ukon Loyalty Card Plus;
- Ipadala ang loan application nga may pirma sang member kag employer, valid ID kag cashcard sa email address nga ginhatag sang Pag-IBIG Fund, base sa main office sang employer; kag
- Mahimo man nga ang employer na mismo ang mag-send sang application form kag iban pa nga documentary requirements sang empleyado sa email address sang Pag-IBIG Fund, depende sa nahisugtan sang employer kag sang empleyado.
