ILOILO CITY- Patay ang isa ka anak matapos ginbuno sang iya kaugalingon nga amay sa Pulao, Dumangas, Iloilo.
Ang biktima amo si Levi June Gabica, 27 anyos samtang ang suspek naman amo si Leandro Gabica, 50 anyos.
Sa interview sang Bombo Radyo kay Mildred Gabica, iloy sang biktima kag asawa sang suspek, iya ginpahayag nga nag-inaway kag nagpukutay ang biktima nga may dala nga kutsilyo kag ang manghud sini nga si Lester Gabica,25 anyos.
Suno kay Mildred, naggwa ang iya bana agud magtambag sa diin naagaw sini ang kutsilyo gikan sa biktima kag nabun-an ini sang suspek.
Pahayag sang iloy, gin-scrap nga rim sang motorsiklo gid lang ang gin-awayan sang iya kabataan nga nagatrabaho bilang manug-scrap.
Sa subong, nakahunong na sa Dumangas Municipal Police Station ang suspek.
Mensahe naman sang asawa sa iya bana nga akuon nalang ang nahimo nga krimen bangud nga indi man niya hungod ang pagbuno-patay sa ila anak.
Samtang sa interview sang Bombo Radyo kay Police Major Joven Arevalo sang Dumangas Municipal Police Station, iya ginpahayag nga naggwa sa imbestigasyon nga may dala man nga kutsilyo ang suspek santo sa panaysayon sang mga testigo.
Ini baliskad sa pahayag sang asawa sang suspek nga gin-agaw lang niya ang kutsilyo sa iya bata antes ini nabun-an.
