Pilason ang isa ka amay matapos ginlabo sang iya kaugalingon nga anak sa Brgy. Igtuble, Tubungan, Iloilo.
Ang biktima amo si Renato Talundata, 49, isa ka mangunguma, samtang ang suspetsado naman amo si Alvin Talundata, 28, lunsay residente sang nasambit nga barangay.
Sa interview sang Bombo Radyo kay Police Master Sergeant Hernani Paras Jr., Chief Investigator sang Tubungan Municipal Police Station, iya ginpahayag nga may okasyon sa balay sang biktima kag suspetsado kon sa diin, naginom-inom sila.
Sang mahubog, nagwaras ang suspetsado kag nanghangkat sang inaway sa ila sagwa sang balay.
Ginpunggan naman ini sang biktima, apang naglab-ot sa pagbinaisay kag ginlabo ini sang suspetsado.
Nakaangkon ang biktima sang pilas sa iya sag-ang, kamot kag nagkalain-lain nga parte sang iya lawas.
Gilayon man ini gindala sa Tubungan Rural Health Unit kag ginrefer sa Representative Pedro G Trono Memorial Hospital, Guimbal, Iloilo.
