ILOILO CITY — Ospital ang gintup-an sang bata samtang presohan naman ang nadangtan sang amay pagkatapos magkinagamo sa ila man lang mismo balay sa Brgy. Botongon Estancia Iloilo.
Sa exclusive interview sang Bombo Radyo kay Ginang Bing Gabalas, ginpahayag sini nga hubog nga nag-abot sa ila balay ang bana sini nga si Manuel Gabalas kagab-e sa diin nasalapay kag natumba gid sini ang aparador nga ginabutangan sang mga bayo sang kabataan.
Diri na kag nagbangon ang bata nga si Emmanuel, 19 anyos, kag ginsaway ang iya amay.
Naakig ang amay sa gin-obra sang bata sini sa diin may pagkomprontahanay pa nga nagpatunga sa duha bag-o ang mga ini nagpukotay sa diin natigayon nga makuha sang bata ang bara kag amo ang ginlampos sa iya amay.
Naigo gid sa ulo ang amay apang nakabalos pa kag nabun-an ang bata sa wala nga bahin sang kilid.
Ginpili nalang sang bata nga magpalayo kag sang natalupangdan sang iloy ang pag-ululagay sang dugo gilayon sini nga gindala sa ospital si Emmanuel samtang nabilin naman nga nagabaruro sa kasakit ang bana nga si Manuel. Ginpapreso man sini ang bana agud matudlo-an sang leksiyon.