JANIUAY, ILOILO – Ginbawi-an sang kabuhi ang 10 anyos nga anak ni anay Janiuay, Iloilo Mayor Jojo De Paula bangud sa Dengue Hemorrhagic Fever.
Sa interview sang Bombo Radyo kay De Paula, iya ginkumpirma ang masubo nga balita.
Suno kay De Paula, nagtinir sang 16 ka adlaw sa sulod sang Intensive Care Unit (ICU) ang iya anak nga babayi bag-o ginbawi-an sang kabuhi.
Ginpahayag ni De Paula nga natukiban nga may yara sang Dengue ang iya bugtong nga anak sang nagahingapos na ang iya termino bilang alkalde sang Janiuay.
Luyag naman sang anay alkalde nga mangin advocate sa pagtapna sang Dengue agud nga indi maagyan sang iban nga ginikanan nga madulaan sang anak bangud sa nasambit nga balati-an.\
