Nagdangop sa Korte Suprema ang anak ni former presidential spokesperson Harry Roque agud mabuligan ang iya amay kag indi pagdakpon kasunod sang arrest order nga ginpaguwa sang Kamara bangud wala ini nagpasa sang gina-request sang quad committee nga financial records.
Subong nga adlaw, Septyembre 23, sang gin-file ni Bianca Roque ang petition para sa writ of amparo kun sa diin gina-request nga proteksyunan si Harry sa tunga sang ginaalegar paglapas sang quad comm sa iya constitutional rights.
May gin-request man nga Temporary Protection Order para indi matigayon ang pag-aresto.
Base sa Rules of Court sang Korte Suprema, kun ma-file ang petition for certiorari, dapat nga i-review sang high court ang lihok sang anuman nga tribunal, board ukon officer agud matumod kun ginhimo ini nga sulod sa ila authority. Pagatumuron man kun may yara bala sang “grave abuse of discretion.”
Nahibaluan nga nag-ugat ini sa pag-suspetsa sang mga mamaliha nga may kahilabtanan si Roque sa iligal nga Philippine Offshore Gaming Operators (POGO) bangud sa makatilinga nga gulpyada nga saka sa iya assets kag ginaalegar pag-assist sini sa pag-renew sang lisensya sang iligal nga Pogo.
Duha ka beses na nga na-cite in contempt si Roque — sa una, na-detain siya sa sulod sang 24 oras sa Kamara, samtang sa ikaduha naman, wala na siya nagsipot kag wala man nagbaton sang contempt order.
Una na ini nagpahayag nga indi siya magpadakop samtang nga wala pa sang desisyon ang Korte Suprema kaangot sa pagkwestyon sini sa legalidad sang arrest order sang Kamara.
Una naman nga nag-isyu ang quad comm sang show cause order para sa asawa ni Roque nga si Mylah. Ginapatihan sang mga mamalidha nga ang financial records sang mga Roque ang makatumod sa source sang manggad sang ila pamilya kag kun involved gid man ini sa Pogo operations.#
