Gindagdagan sang disciplinary action ang 19-anyos nga anak sang seasoned TV host nga si Kim Atienza bangud sang pagpasakop sini sa pro-Palestinian protests samtang yara sa isa ka eskwelahan sa Estados Unidos sang Amerika.
Ini amo si Eliana Atienza, estudyante sang University of Pennsylvania, nga isa sa anum nga na-suspinde sang nagligad lamang nga Mayo 9.
Ginatudlo nga rason amo ang pagpasakop sini sa protest encampment batok sa Israel bangud sa gyera sang amo nga pungsod batok sa Hamas sa Gaza.
Ginpahayag nga nalakip sa ila nga gin-apelar sa university administrators amo nga utdon sang buluthuan ang ila nga financial ties sa Israel. Ginpahayag man nga isa man si Eliana sa nagpirma agud suportahan ang Palestinians nga nagapakigbato agud nga mahilway ang ila kaugalingon nga duta gikan sa Israeli occupation.
Kaangot diri, gin-report sa international media nga matapos ginpaidalom sa mandatory temporary leave bangud sa pending investigation, nagsiling si Eliana nga ginmanduan ini nga magseparar sa unibersidad, ginkakasan sang access sa iya dormitory, kag gindumilian nga magsulod sa diin man nga school facility. Gin-quote man sang Washington Free Beacon si Eliana nga nagasiling nga biktima siya sang “administrative violence”.
Nagsabat naman si Atienza sa sini nga isyu kun sa diin gin-athag sini nga suportado niya kag sang iya pamilya ang adbokasiya sang iya anak. Gin-klaro man sang host nga indi pro-Hamas ang iya anak, apang parte siya sang organisasyon nga “anti-genocide and anti-war.”
Kaangot naman sa isyu nga wala na sang puluy-an si Eliana, sabat ni Atienza: “She was technically homeless because she was removed from her dorm. Unfortunately, that message was taken out of context. She never said she was poor.”
Gin-athag man sini nga wala na-expel ang iya bata. “She had some academic sanctions, but she will be back in the next semester as they are on summer break right now,” pahayag pa sini.#
