Patay ang 19 anyos nga anak sang Sangguniang Bayan Member sa banwa sang Leganes, Iloilo matapos ini ginluthang samtang sakay sa iya nga motorsiklo sa Metropolis Avenue, Jaro, Iloilo City.
Ang biktima amo si Carl Dominic Labuson.
Sa interview sang Bombo Radyo kay PCapt. Eduardo Siacon Jr., hepe sang Jaro Police Station, iya ginpahayag nga igo sa ulo kag sa dughan ang naangkon sang biktima apang indi pa mapat-od kun pila gid ang igo ni Labuson.
Suno kay Siacon, base sa mga nakakita sa insidente, may yara sang pagbinaisay nga natabo, nagpahigad ang duha ka mga motorsiklo kag ginkakibot na lang nga nagpalupok na sang armas ang suspek.
Pahayag niya, ginacheck subong sang Jaro PNP ang mga Closed Circuit Television (CCTV) footage.
Wala pa sang ihibalo ang kapulisan kun ano ang rason sang pagbinaisay sa tunga sang biktima kag suspek.
Base sa mga panaysayon sang mga nakakita, sundanay lang ang biktima kag suspek samtang sakay sa ila man tagsa ka mga motorsiklo.
VC OF PCAPT EDUARDO SIACON JR. (POL CAPT EDUARDO SIACON JR)
(PATAY 222)
Suno naman sa iloy sang biktima, upod ni Carl ang iya nga manghod nga nagpadulong sa convenient store sa Leganes agud magbakal sang pagkaon.
Apang ginbilin niya ang iya manghod sa store bangud naglakat ang biktima agud nga magpatughong sang iya nga motorsiklo.
Ginkatingala na lang sang utod nga wala na nakabalik pa ang iya nga magulang.
Nagapanindugan ang pamilya Labuson nga indi nila pagpaidalom sa swab test para sa COVID-19 ang biktima nga anak ni Sangguniang Bayan Member Larry Labuson matapos ini ginluthang-patay sang suspek nga wala makil-an sa Metropolis Avenue, Jaro, Iloilo City.
Sa interview sang Bombo Radyo kay SB Member Labuson, iya ginpahayag nga malapit lang ang ginluntaran sang krimen sa ospital nga gindal-an sang biktima gani indi niya mahangpan kun ngaa ipa-idalom pa sa swab test ang iya nga bata.
Suno kay Labuson, magluwas sa pagpa-swab test sa iya anak, pabaydon pa sila sang P4,500 para diri.
