ILOILO CITY – Tuman ang kalipay sang pamilya sang Bombo martyr kag anay Area Manager sang Bombo Radyo Visayas nga si Rino Arcones matapos makapasar ang anak sini sa 2016 Bar Examinations.
Sa interview sang Bombo Radyo kay Mrs. Tess Arcones, ginpahayag sini nga nagapasalamat siya bangud gintuman sang Diyos ang iya pangamuyo nga makapasar sa Bar Exam ang anak nila nga si Therese Lorraine Grace Arcones.
Si Atty. Arcones ang nagtapos sang iya pre law sa University of the Philippines (UP) Visayas sa kurso nga BS Marketing kag nagkuha sang Bachelor of Laws sa University of San Agustin sa diin kadungan sini ang No. 4 nga si Allana Mae Babayen-on.
Suno kay Mrs. Arcones, wala ini nagalaum nga mangin abogado ang iya anak bangud wala man niya ini ginhandum sadto.
Apang sang makatapos ini sa kolehiyo, nangin inspirasyon ni Therese ang iya tiyo nga abogado.
Sa subong, nagatrabaho ini sa isa ka pribado nga kompaniya kag ginapanumdom pa sini ang iya masunod nga plano matapos makapasar sa Bar Exam.
Nahibaluan nga isa ka tuig kag tunga pa lang si Atty. Arcones sang ginpatay ang iya amay.