ILOILO CITY – Ginkwestyon sang anak sang ginpatay nga si Bayan Panay Coordinator Jory Porquia ang rason ni Jeffrey Celis ukon Ka Eric Almendras sa pag red-tag sa mga lehitimo nga aktibista.
Sa exclusive interview sang Bombo Radyo kay Lean Porquia, iya ginpahayag nga wala sang kredibilidad si Celis bangud lunsay kabutigan ang iya pahayag nga siya ang estudyante sang University of the Philippines, miyembro sang grupo nga SAMASA kag League of Filipino Students.
Suno kay Porquia, wala man sang kamatuoran nga naka-upod ni Celis si Ella Colmenares nga utod sang aktres nga si Angel Locsin nga naangot sa Kabataan partylist.
Ginpahayag ni Porquia nga indi niya mahangpan nga ang sadto anay ginatawag niya nga Tito Jeff ang nagatum-ok sa iya subong kag amo ang nagabutang sang kabuhi sang mga aktibista sa ital-ital.
Kadungan sini, ginkwestyon man ni Porquia kun nga-a subong lang nagpaguwa sang expose si Celis nga nadala sa narcolist sang Presidente.
Sa pagkamatuod suno sa natungdan, lunsay palusot na lang ang pahayag ni Celis nga ang iya pagkalakip sa narcolist ang kabahin sang government project.
