Nagpasalamat sa Bombo Radyo kag kay Iloilo City Lone District Representative Julienne “Jamjam” Baronda ang anak sang Ilongga nga overseas Filipino worker (OFW) sa Abu Dhabi, United Arab Emirates.
Ini bangud nga may kumpirmasyon na nga dal-on ang bangkay sini pauli sa Pilipinas.
Sa interview sang Bombo Radyo kay “Alyas Boy”, iya ginpahayag nga nakontak na sila sang Overseas Workers Welfare Administration (OWWA) sa Abu Dhabi kag sa Region 6 para sa pagproseso sang pagpauli sa bangkay sang iya iloy.
Ini matapos nga mabaton sang Embahada sang Pilipinas ang sulat nga naga-request sa mga kinahanglanon sa pagpauli sang iya iloy.
Suno kay Alyas Boy, may ara sang working visa ang iya iloy, gani natigayon nga ma-resolbar kag napamatud-an man nga indi ini TNT sa Abu Dhabi.
Ginpahayag man ni Alyas Boy nga sang una nagapati ini nga may ara sang foul play nga natabo sa kamatayon sang iya iloy, apang sa iya pagpakig-angut sini sa mga kaabyanan sang iya iloy, nahibaluan sini nga may ara ini sang problema.
Suno pa kay ”Alyas Boy”, nagaproblema sa pinansyal ang iya iloy kag amo man ang madali nalang nga expiration sang iya visa.
Magluwas nga madamo ini sang galastuhan kag kinahanglan nga suportahan, ginpahayag man nga may ara man sang mga kautangan ang ila pamilya.
