PASSI CITY – Makatalandog balatyagon ang ginhimo sang isa ka lalaki nga estudyante para sa iya classmate nga babaye sa Passi City National High School sa diin ginregaluhan niya ini sang bag-o nga sapatos para sa iya graduation.
Ang lalaki nga estudyante amo si Julian Maratas sang Población Ilawod, Passi City, sa diin ang iya amay ang Principal sa Gines Viejo Elementary School kag Principal naman sang iloy sini sa Passi 1 Elementary School.
Ang babaye naman nga estudyante naman amo si Gwen Soncio sang Dacal, San Enrique, Iloilo sa diin ang iya iloy ang nagatrabaho sa kampo sang tubo kag ang amay naman sini ang nagabaligya sa Lapuz Port sa Iloilo City.
Sa interview sang Bombo Radyo kay Ferlie Joy Manejo-Lanaria, manunudlo sa nasambit nga eskwelahan, ginpakigbahin sini ang istorya nanday Maratas kag Soncio nga lunsay honor students kag classmates sa ABM 12 – Integrity class.
Suno kay Lanaria, nagpadala sang mensahe sa iya si Maratas kag gin-usisa kun ano nga sapatos ang mahimo gamiton sang mga babaye sini nga classmates bangud nakit-an sini nga wala si Soncio sang sapatos.
Samtang suno naman kay Maratas, naghingyo ini sa iya iloy kun may yara ini sang daan nga sapatos nga mahimo sini mahatag kay Soncio, apang sa ulihi, nagdesisyon nga baklan na lang ini sang bag-o nga sapatos.
Ginpahayag sini nga nakit-an niya si Soncio nga nagahimakas sa pagtuon kaangay sang iya ginikanan gani nagdesisyon ini nga buligan pinaagi sa paghatag sang sapatos agud magamit sa iya graduation.
Nagalaom man si Maratas nga dungan sila nga makatapos ni Soncio sa kolehiyo.
Plano ni Maratas nga magkuha sang kurso nga Bachelor of Science in Information Technology.
Emosyonal naman nga nagpasalamat si Soncio sa kaayo nga ginpakita ni Maratas sa iya.
Suno kay Soncio, apisar pigado lang ini, nagahimakas ini nga makatapos sa pagtuon.
Plano naman sini nga magkuha sang kurso nga Bachelor of Science in Business Administration sa kolehiyo.
