Masobra sa tunga sa milyon ka pesos ang balor sang iligal nga droga ang nakumpiskar halin sa anak sang isa ka punong barangay kadungan sang drug buy bust operation nga ginpatigayon sang Iloilo Provincial Drug Enforcement Unit.
Ang subject amo si alias Toto, 46, residente sang Tigbauan, apang nadakpan sang mga pulis sa Barangay Poblacion South, Oton, Iloilo.
Sa interview sang Bombo Radyo kay Police Major Dadje de Lima, head sang PDEU, iya ginpahayag nga P510,000 ang standard drug price sang 75 gramos nga ginapasuni shabu nga ila nga nakumpiskar.
Ginakabig si Toto nga high value individual (HVI).
Isa ka bulan man ini nga gin-monitor sang mga pulis antes ini nadakpan sang mga operatiba sang Iloilo Police Provincial Office (IPPO)-PDEU.
Ginpaidalom man ang subject sa drug test. Yara ini subong sa kustodiya sang kapulisan kag magapangatubang sang reklamo nga paglapas sa Comprehensive Dangerous Drugs Act of 2002.#
