ILOILO CITY- Wala napunggan sang anak nga sukmaan ang iya ginikanan kun ngaa natabo ang trahedya sa ila pamilya sang nasunog ang ila balay sa Barangay Dalusan, Maasin, Iloilo.
Sa amo nga sunog, patay ang tatlo ka kabataan nga mag-utod nga lunsay menor de edad matapos nga na-trap sa ila balay nga ginlamon sang kalayo.
Ang mga naga-edad nga lima kag apat ka tuig ang lunsay pa Persons With Disability ukon indi makalakat bangud sa ginapahayag nga polio.
Magluwas sa mga napatay, nasamaran man ang duha nila ka utod nga nagaedad sang 12 ka tuig kag walo ka tuig.
Sa interview sang Bombo Radyo kay Cecilia Consumo, himata sang mga biktima, iya ginpahayag nga sang natabo ang sunog, wala sa ila balay ang ginikanan sang kabataan bangud nagpadulong ini sa namatyan.
Suno kay Consumo, ginsukmaan sang walo ka tuig nga bata nga survivor ang iya iloy nga wala kuntani natabo ang trahedya kun namati lang ini nga indi maglakat sa namatyan.
Nahibaluan nga nagapabilin sa ospital ang duha ka mag-utod nga survivors.
Sa interview naman sang Bombo Radyo kay Alex Consumo, tiyo sang mga biktima, naabtan pa niya nga buhi ang agot sa mag-ulutod apang wala na niya ini maluwas bangud sa tuman ka dako nga kalayo.
Ginapatihan nga ang dabok sa idalom sang hagdan ang ginhalinan sang kalayo.
Wala man gilayon napalong ang kalayo bangud malayo pa ang bubon nga sarang makuhaan sang tubig.
