Ginkaalarma sang Anakbayan West Visayas State University- Main Campus ang ginaalegar student intel sa sulod sang nasambit nga unibersidad.
Sa interview sang Bombo Radyo kay Matthew Gonzaga, spokesperson sang Anakbayan WVSU, iya ginpahayag nga Agosto 2024 sang nagsulod ang nasambit nga student intel sa ila organisasyon.
Suno kay Gonzaga, nagpakilala ang student intel bilang si “Simon” nga isa ka first year student sa idalom sang College of Education Major in English kag nagakuha sang CWTS ukon Civic Welfare and Training Service (CWTS) sang National Service Training Program (NSTP).
Ginpahayag man sini nga ginbaton na lang sang ila organisasyon si Alyas Simon apisar nga wala ini sang identification card ukon ID bangud man sa iya pahayag nga bag-ohanon lang siya.
Ginbuyagyag man ni Gonzaga nga nagsugod na sila suspetsa sa ginapahayag student intel sugod sang Septyembre 2024.
Natukiban man sang natungdan nga patago nga ginakuhaan sang mga litrato sang student intel ang mga myembro sang nasambit nga organisasyon.
Sang ginpamangkot naman ini kon anhon niya ang laragway, ginpahayag lamang sini nga “for memories”.
Nakit-an man sang organisasyon ang naka-camouflage nga laragway ni Alyas Simon sa isa ka dating app nga nagtulod man sa ila agud mas bantayan ini.
Didto na kag natumod nga anay myembro sang Reserve Officers’ Training Corps (ROTC) ang ginaalegar student intel.
Natu-ad man nga indi lehitimo nga estudyante sang West Visayas State University si Alyas Simon.
Nahibaluan nga kinahanglan bonafide student lang sang unibersidad ang mahimo makasulod sa mga existing organizations sa West Visayas State University.
