ILOILO CITY–Madamu sang pabati-bati si anay 5th district Cong. Niel “JunJun” Tupas Jr. sa manghod nga si Cong. Raul “Buboy” Tupas.
Ini ang kasunod sang pagfile ni Cong. Junjun sang Certificate of Candidacy (COC) kag magabunggo batok sa manghod nga si Cong. Buboy.
Sa interview sang Bombo Radyo kay Cong. Junjun, iya ginpahayag nga ang iya nga pagkandidato sa kinto distrito ang para sa mga pumuluyo.
Ini bangud nga luyag niya nga bag-uhon ang mga sala nga pagsulundan nga ginapatuman sang iya manghod.
Gintu-ad man sang anay mamalidha nga ang mga manunudlo sa 5th district ang ginapahog nga sayluhon sang assignment kun indi magsuporta sa administrasyon.
Magluwas diri, ginsupalpal man ni Cong. Junjun ang malayo nga panimuot sang iya manghod sa mga pumuluyo.
Ini bangud nga kun magpangayo sang bulig ang mga pumuluyo, ang mga staff lang sang iya manghod ang nagasabat.
Ginpahayag man sang anay mamalidha nga kun siya ang maghatag sang bulig, wala sang kabaylo nga kondisyon.
Isa man sa ginawangal ni Cong. Junjun amo nga ginpangdula na ang mga ISKOLAR sang kinto.
Sa pihak sang sibling rivalry sa tunga sang mga Tupas, ginpahayag ni Cong. Junjun nga iya gid suportahan ang iya manghod nga si Barotac Viejo Mayor Niel “Beng” Tupas III nga magakandidato sa pagka gobernador sa probinsya sang Iloilo.