Ginsaysay sang anay bana sang babaye nga ginsulod kag ginpatay sa ila puluy-an nga nakaupdanay pa sila kagab-i sa Barangay Arante, Sara, Iloilo.
Ang biktima amo si Grace Asiwagan Fortaleza, 44-anyos, residente sang nasambit nga lugar.
Ginapatihan naman nga ginhimuslan sang suspek ang 17-anyos nga hinablos sang biktima matapos ginhimo ang krimen.
Sa interview sang Bombo Radyo kay Gilberto Fortaleza, anay bana sang biktima, iya ginpahayag nga duha na ka tuig sang sila ang nagbulaganay ni Grace matapos man ang 24 ka tuig nga pag-updanay sa isa ka balay nga nagbunga man sang isa ka anak kag sa subong yara sa iya luyo.
Suno kay Fortaleza, antes ang krimen, si Grace ang nagakatulog sa ila balay kon sa diin ginapahayag nga ginsulod sang suspek paagi sa ila bintana.
Sa amo nga tion, kaupod naman ni Grace sa puluy-an ang 17-anyos nga hinablos sini.
Ginkakibot naman ni Fortaleza nga pagkasapo niya sa iya nga asawa, may patal ini nga pilas sa guya kag sa baba, kon sa diin nayupok gid ang piyak nga bahin sang guya sini.
Sa iya pagkilala kay Grace, ginlaragway sini nga isa ka mabuot kag nagatinguha nga iloy agud nga mabuhi ang ila nga bata kag ang 17-anyos nga hinablos sini nga ginasagod.
Ang pagpati naman sang ila pamilya amo ang tuyo sang suspek nga himuslan ang 17-anyos nga dalaga, apang sa amo nga tion, nakabugtaw si Grace kag ginlamposan sang suspek agud nga indi na makapangayo pa sang tabang.
Santo naman sa pahayag sang 17-ayos nga babaye, nakatabon ang ulo sang suspek, kon sa diin, mata lang ang makit-an sini.
Gintumod man sang dalaga nga ginkuga siya sang suspek, kon sa diin, nagpakuno-kuno ini nga nalipong agud nga makapalagyo.
Sa inisyal nga imbestigasyon, intact ang panapton ni Grace kag wala makitaan sang senyales nga ginhimuslan sang suspek.
Wala naman sang ideya ang anay bana ni Grace kon may bag-o ini nga karelasyon, rason man nga isa ka dako nga palamangkotanon kon sin-o ang naghimo sang krimen .
Gin-athag man ni Fortaleza nga wala sila sang indi pag-intindihanay ni Grace antes natabo ang krimen.
Sa subong, indi paman ma-establisar sang kapulisan kon ang tuyo sang suspek amo ang himuslan ang menor-de-edad ukon patyon ang biktima nga si Grace.
