ILOILO– Gin-athag ni anay Iloilo City Councilor Joshua Alim nga wala siya nakabaton sang notice gikan sa Department of Justice tuhoy sa pagpasaka sang reklamo sang Panay Electric Company.
Ini ang may kaangtanan sa falsification of public documents nga ginpasaka batok kay Alim kaupod sanday anay Iloilo City Councilor Plaridel Nava, Presidential Consultant for Western Visayas Jane Javellana kag Dr. Marigold Gonzalez.
Sa interview sang Bombo Radyo kay Alim, iya ginpahayag nga nabaton nila ang subpoena gikan sa Department of Justice sang nagligad lamang nga Setyembre 3 kun sa diin ginamanduan sila nga magpasa sang mga dokumento nga sabat sa reklamo sang Panay Electric Company lakip man ang pagpadulong sa korte sa Manila agud magtambong sa preliminary investigation.
Suno kay Alim, imposible nga matapos nila ang tanan nga ginapangayo nga mga dokumento bangud tuman ka lip-ot ang ginhatag sa ila nga tiyempo.
Dugang sang natungdan, ginhatagan sila sang 15 ka adlaw nga extension agud makompleto ang mga gina pangayo nga dokumento.
Nagpanawagan naman ang anay City Councilor sa tanan nga nagpirma sa petisyon nga ila ginpalibot batok sa franchise renewal Panay Electric Company nga buligan sila nga pamatud-an nga wala ginpeke ang pirma.
