ILOILO CITY–Nagalibog ang ulo ni anay Department of Health (DOH) Secretary Janette Garin tuhoy sa liwat-liwat nga kaso nga ginapasaka batok sa iya kag sa iban pa nga mga opisyal sang DOH may kaangtanan sa kontrobersyal nga dengue vaccine.
Sa interview sang Bombo Radyo kay Garin,  liwat niya nga  ginpanginwala ang akusasyon nga ang Dengvaxia vaccine nga ginpanghatag sang DOH sa idalum sang iya administrasyon sadto amo ang rason sang kamatayon sang mga kabataan nga nabakunahan sang Dengvaxia.

Sunu kay Garin, lunsay kabutigan ang ginapagwa sang Public Attorneys Office (PAO).
Sa pagkamatuod sunu sa anay tiglikom, ang iban nga ginapasuni nagkalamatay tungud sa Dengvaxia ang wala man nabakunahan sang nasambit nga bakuna.
Ginakasubo man sang anay tiglikom nga labi nga naapektuhan sang mga kabutigan sang PAO amo ang mga public health programs sang DOH.
Madamo sang mga ginikanan sunu kay Garin ang nadulaan sang salig sa DOH rason nga nagnubo ang turn-out sang vaccination program sang nasambit nga talatapan.
Nahibaluan nga dugang nga tatlo ka kaso ang ginpasaka sang PAO batok kay Garin kag sa 36 ka iban pa nga mga opisyal sang DOH sa Department of Justice (DOJ).
Samtang,  ginapanugyanan naman sang anay tiglikom ang publiko ilabi na ang mga ginikanan nga indigilayon magpati sa mga sala nga impormasyon kaangot sa mga programa sang DOH.
Sunu kay Garin nga nagatinguha ang gobyerno nga maamligan ang ikaayong lawas sang mga Pilipino pinaagi sa mga program sang DOH.